It feest giet net troch!

Wy hawwe krekt fan Elske fernaam dat it feest spitich genôch net troch gean kin (sjoch 'Geruchten...'). De reden hjirfoar is dat it net goed giet mei Jorrit. Der binne in soad herinnerings út syn ferline werom kaam.

Hy hat dêrom in goed petear hân mei Elske. Wat der krekt mei Jorrit oan 'e hân is, witte wy net. Mar Elske en Jorrit hawwe ús sein dat dat wol dúdlik wurdt by de útstjoering oer famylje en freonen. Elske fynt it wol spitich dat it feest net troch giet, mar it sil noch al wêze. De hyves-freonen wurde dan fansels wer útnoege. Sa gau 't sy wit wannear't it heve sil, lit sy it ús witte.

Geruchten...

We ha geruchten heard dat Elske al har hyves-freonen en freondinnen útnoegje wol foar har feestje op snein 30 septimber. Mar dan ek allinnich mar alle hyves-freonen. Dus meld dy oan!

It skynt dat se der opnames foar Omrop Fryslan meitsje sille, foar it programma Linkk. Dus wês der by!

Dy fan Linkk

Foar de simmerfakânsje hawwe wy ôfskie nommen fan Errol, Glenn, Esmee en Saskia. Errol is mei syn heit nei Ingelân gien. De trije oaren studearje no. En Anne-Marit wie fan ’t winter al nei it bûtenlân gien foar in staazje.
It wie wol ferfelend dat se hast allegear tagelyk fuortgienen. Se hienen ommers by Omrop Fryslân in priis wûn mei in filmke. Se mochten derom sels koarte reportaazjes meitsje. Saskia en Glenn en Esmee wienen te âld, it wie oan’t en mei 17 jier.
Gelokkich kamen Jorrit en Elske yn de simmerfakânsje in pear jonges en fammen tsjin dy’t wol meidwaan woenen oan de filmploech.
Foar lêzers en sjoggers fan Linkk sette wy alle âlde en nije Linkkspilers eefkes op in rychje.

Jorrit
Jorrit is eins net in echte soan fan Pier en Brecht. Hy is in omkesizzer, mar omdat hy gjin âlders mear hie, is hy as soan by syn omke en tante kommen te wenjen.
Jorrit hat it altyd oeral hiel drok mei, mar net mei skoalsaken. Hy is no foar de twadde kear sakke foar it eineksamen! Dêr hawwe Pier en Brecht knap lilk om west.
Jorrit hat hiel lang in knipperljocht-relaasje mei Elske, syn nichtsje, hân. No ja, net in echte nicht, omdat Jorrit ek net in echte soan is fan Pier en Brecht. Yngewikkeld hè?
Jorrit is wol echt aktyf as it op regeljen en filmjen oankomt!

Elske
Elske is in pear jier lyn kommen te wenjen yn it selde doarp as Jorrit. Sy hat in soarte fan haat-leafde ferhâlding mei har sabeare neef. Elske is net Frysktalich opfieden, mar om Jorrit hat sy it Frysk gau oppikt. Har gefoelens foar Jorrit rinne lyk op mei har gefoelens foar it Frysk. It kin alle kanten opgean.

Giel
De mem fan Giel is de sus fan Oene. Giel, dy’t offisjeel Guillermo hyt, is berne yn Kolombia. No’t syn âlders op wrâldreis binne, útfanhuzet hy by omke Oene.
Dy fynt dat Giel sa gau mooglik nije freonen krije moat. Dêrom hat hy him foarsteld oan Jorrit en Elske.
Giel koe samar de rol fan Errol en Glenn oernimme. Hy is ek in echte techneut.
Oant no ta wie hy drok mei ljocht en lûd, mar de útdaging fan filmjen is krekt wat foar him.

Henk
Henk wennet noch mar in jier yn it doarp. Henk syn heit woe nei de skieding net mear yn Den Helder wenjen bliuwe. Doe’t hy wurk krije koe yn Fryslân is Henk mei him meigien, Syn broerke en suske binne by mem yn Den Helder bleaun.
Dat Henk Diana sa goed begrypt, komt omdat hy sels ek in hiel goede freon ferlern hat. Dat wie Danny. Sûnt de dea fan Danny draacht Henk altyd syn pokeramulet as oantinken.
Hy trof Elske en Jorrit doe’t dy wer ris in kear rúzje hienen. Doe ’t Henk Elske wat te drinken oanbea, hat se him frege om by de filmploech te kommen. Henk hat op syn beurt Diana der by frege.

Diana
Diana is ek nij yn Linkk. Se is frege troch Henk. Diana wennet op in buorkerij in eintsje bûten it doarp.
Diana hat in soad freonen, mar eins mar ien echte freon. Dat is Henk. Diana is twa jier lyn in pear freonen kwytrekke. Dêr praat se net maklik oer. Allinne mei Henk wolris, mar dy hat sels ek in freon ferlern. Dat skept in bân.

Marije
Jorrit en Giel hawwe Marije troffen yn de supermerk, dêr’t se achter de kassa siet.
Sy hat net altyd yn it doarp wenne. Earder wenne se mei heit en mem yn Genemuiden. Mem koe dêr har draai net fine en dêrom binne se weromkommen yn Fryslân.
Marije is net altyd like maklik. In soad minsken fine har brutaal en opstannich.
Se kiest ek gauris de ferkearde freonen, mar dochs sit har hert op it goede plak.

Pier en Brecht
Pier en Brecht binne de heit en mem fan Saskia en Jorrit.
Saskia is krekt út ‘e hûs. Jorrit hat no it ryk allinne.
Pier hat earder by de marine wurke en doe by it fabryk yn it doarp.
No hat hy tegearre mei Brecht in kafee. Dat kafee rint hiel goed.
Aldere minsken komme der foar de bingojûnen. It pokerjen lûkt in protte jongeren.
Brecht wol de boppeseal brûke foar har grutte hobby. Dat is toanielspyljen. Se wol eins in nije toanielklub oprjochtsje yn it doarp. Sy fynt it ek moai dat ‘har’ jeugd sa yn ‘t spier is mei kamera en mikrofoan.

Oene
Oene is in goede maat fan Pier en Brecht èn de –alinnesteande- heit fan Anne-Marit. Sûnt syn dochter yn it bûtenlân wennet is it wol hiel stil yn ‘e hûs. Dêrom hat Oene ek oanbean dat syn omkesizzer Giel, of Geale sa’t hy him neamt, wol in jier by him komme kin te wenjen. De âlders fan Giel binne in jier op reis. Dat wie in dream dy’t se al jierren hienen. Tanksij Oene kin dy dream no werkelikheid wurde.

Berber oer Suriname

Berber Bouma út Bakhuzen is mei har heit en mem, broer Jurjen (14 jier) en broerke Wisse (9 jier) ferhuze nei Paramaribo. De famylje Bouma woe wolris wat oars en doe koe Berber har heit in baan krije by in grutte bakkerij yn de haadstêd fan Suriname. Mei harren fiven binne se yn augustus 2005 nei de oare kant fan de Atlantyske Oseaan gongen. Se koenen alles meinimme, útsein de kamper en de kano’s. Dy hawwe se ferkocht.

>>Mear yn Linkk 1 fan septimber 2007>>

M&M’s, Miranda & Marissa Visser binne échte Flitsers

Miranda Visser (13) út Langwar sylt al fjouwer jier tegearre mei har suske Marissa (10) yn de Flitsklasse. Mei harren boat ‘M&M’s’ dogge se mei oan wedstriden. It ôfrûne jier einigen se tidens it Nederlâns kampioenskip op de Langwarder Wielen as sânde yn in dielnimmersfjild fan fjouwerenfjirtich. Beide sile se it leafst mei hurde wyn en sûnder rein. Dat oare bern silen soms mar saai fine, begripe de suskes net. ‘Sile yn in Flits is leuk, gesellich en learst der in soad fan.’

>>Mear yn Linkk 1 fan septimber 2007>>

Bisto snoad genôch foar it Mercator Undersyksteam?

Mercator is it kennissintrum foar meartaligens yn Europa. En it stiet yn Ljouwert. Dêr wurdt ûndersyk dien nei lytse talen en gebieten dêr’t mear as ien taal sprutsen wurdt.

Witsto bygelyks dat der mear as 50 miljoen minsken yn Europa in minderheidstaal (lykas it Frysk) sprekke? Dat binne trije kear safolle minsken as der yn Nederlân wenje.
En witsto …

• dat it Frysk troch mear minsken sprutsen wurdt as it Yslânsk?
• dat it Katalaansk yn meardere lannen sprutsen wurdt, nammentlik yn Spanje, Frankryk en Itaalje?
• dat ek it Baskysk net allinne yn Spanje, mar ek yn Frankryk praat wurdt?
• dat der mear sprekkers binne fan it Katalaansk as it Deensk?
Sjoch ek mar ris op de talekaart fan Europa yn ‘e midden fan dizze Linkk.

>>Mear yn Linkk 1 fan septimber 2007>>

BEIJNG moat in jier foar de iepening al topprestaasjes leverje

Yn Beijng, de haadstêd fan de Folksrepublyk Sjina, is it ôftellen begûn. Takom jier wurde hjir de 29e Olympyske Simmerspelen hâlden. Op ferskillende plakken yn Beijng steane grutte ôftelklokken dêrst op de sekonde nei sjen kinst hoelang it noch duorret oant 8 augustus 2008, jûns om 20 oer achten. Dat is it momint fan de offisjele iepening. Wêrom al dy achten, 8-8-2008, 20.08 oere? Dat is gjin tafal: yn Sjina is acht in geloksgetal.

>>Mear yn Linkk 1 fan septimber 2007>>

‘Live-sjonge mei gitaar jout in kick!’

‘Yn Holwert bin ik berne, dêr ha ik altyd wenne,’ sa begjint de tekst fan Patricia van der Wal en Brechtje Brouwer. It is harren eigen Fryske ferzy fan ‘Breakaway’ fan Kelly Clarkson. De beide famkes fan it Dockingakolleezje yn Ferwert wûnen dêrmei yn maaie de earste priis foar de bêste tekst by SjONG, it Frysktalich sjongfestival foar de jongerein.

>>Mear yn Linkk 1 fan septimber 2007>>

‘Harry Potter yn it Frysk komt hiel tichtby’

Doe’t Jetske Bilker frege waard om it earste diel fan Harry Potter oer te setten yn it Frysk, moatst se dêr earst wol eefkes oer neitinke. Se wie op dat stuit dwaande mei it skriuwen fan in eigen roman en dat betsjutte dat se dy in pear moanne oan de kant lizze moast. Boppedat hie se neat mei tsjoenderij.

Jetske koe Harry Potter wol, mar allinne fia de bern op skoalle. Se wie nammentlik dosint Frysk en Nederlânsk op it Comenius Achter de Hoven yn Ljouwert. Mar in jier lyn hat se it ûnderwiis farwol sein en sûnt dy tiid is se folslein skriuwster.

>>Mear yn Linkk 1 fan septimber 2007>>

Fiskje

Wy sieten op de steiger by de feart, in lyts eintsje bûten it doarp. It fêste fiskplakje fan foaral de âlde mannen út ús doarp. Mar hjoed wienen dy der net.
’Gelokkich net’, tocht ik by mysels.
Jetse wie der wol. Net op ‘e steiger, mar hy siet in eintsje fierderop. Hy hie ús grif wol oankommen sjoen. Hy siet yn it hege gers mei twa angels. Hy sei neat en wy ek net.

Lútsen en ik setten ús angels yn elkoar. Lútsen wie der samar mei klear, hy fiske wol faker. Mar foar my wie it noch in hiele toer om fan dy trije stikken bamboe in angel te meitsjen.
‘Wat duorret dat lang mei dy’, sei Lútsen, ‘do fiskest dochs wol faker? Of is it hjoed dyn earste kear?’
Hy lake, mar ik net.
‘Dizze angel is net fan my, mar fan Jildert. Ik mocht him wol even liene. Hy hat dy fan my stikken makke. Dy djoere. Do witst wol’.
Dat wie net wier. Ik hie sels net iens in angel. Ik fiske noait, want ik hold der net fan. Hiel lang lyn, hie ik wolris fiske mei myn omke Harke. Dy fiske hiel faak, want hy hie oars dochs neat te dwaan. Ik fûn der doe ek al neat oan. En no ek net. Mar dat hoegde Lútsen fansels net te witten.

>>Mear yn Linkk 1 fan septimber 2007>>

Ynterview mei Elske op scholieren.com

In leuk ynterview mei ús Elske, Else Feikje van der Berg, mei in hiele protte reaksjes.

http://www.scholieren.com/magazine/
acteren_geen_talent_geen_hoop